በሶማሊ ክልል ከ1 ነጥብ 8 ቢሊየን ብር በላይ በጀት እየተገነባ ያለው የጅግጅጋ–ገላልሼ–ደገህመደው- ሰገግ የአስፓልት መንገድ

Sept. 6, 2022

በሶማሊ ክልል ከ1 ነጥብ 8 ቢሊየን ብር በላይ በጀት እየተገነባ ያለው የጅግጅጋ–ገላልሼ–ደገህመደው- ሰገግ የአስፓልት መንገድ በመፋጠን ላይ እንደሚገኝ የኢትዮጵያ መንገዶች አስተዳደር ገለጸ
________________________________________
(ሶመብኤ፤ ነሐሴ 28 2014 ዓ.ም ) በሶማሊ ክልል ከ1 ነጥብ 8 ቢሊየን ብር በላይ በጀት እየተገነባ ያለው የጅግጅጋ – ገላልሼ – ደገህመደው- ሰገግ የአስፓልት መንገድ 110 ኪሎ ሜትር የሚሸፍን ሲሆን ከመንገዱ አጠቃላይ ግንባታ እስካሁን 41 በመቶ መከናወኑ የኢትዮጵያ መንገዶች አስተዳደር ገልጿል ።

የኢትዮጵያ መንገዶች አስተዳደር የፕሮጅክቱ ተቆጣጣሪ ኢንጂነር እዝራ ሽብሩ እንዳሉት፤ “የጅግጅጋ – ገላልሼ – ደገህመደው- ሰገግ መንገድ አስተዳደሩ በክልሉ የተለያዩ አካባቢዎች የሚያስገነባቸው አስፓልት መንገዶች አካል ነው።

ሀገር አቀፍ ተቋራጭ በሆነው የ“ቤአኤካ” ድርጅት እየተገነባ ያለው መንገድ በሚቀጥሉት አንድ ዓመት ከሥምንት ወራት ውስጥ ቀሪ ስራዎችን ለማጠናቀቅ ስራ እየተፋጠነ መሆኑን ገልጸዋል።

መስሪያ ቤታቸው ፕሮጀክቱ በተያዘለት የጊዜ ገደብ ውስጥ እንዲጠናቀቅ ለተቋራጩ አስፈላጊውን ድጋፍ እያደረገ እንደሚገኝ ያመለከቱት ኢንጂነር እዝራ ፤ በክልሉ ተከስቶ የነበረው ድርቅ ተከትሎ የተፈጠረው የውሃ እጥረት የመንገዱን የስራ እንቅስቃሴ እንደፈተነው አንስተዋል።

ሆኖም የውሃ ችግሩን ለመፍታት አማራጭ የዝናብ ውሃ ማሰባሰቢያ ኩሬ በማዘጋጀት ከፕሮጀክቱ በተጓዳኝ የአካባቢ አርብቶ አደር ለቤት እንስሳት እንዲጠቀም በማድረግ አስተዳደሩ ማህበራዊ ኃላፊቱን እየተወጣ እንደሚገኝ ተናግረዋል።

የመንገድ ስራ ተቋራጩ ”ቤአኤካ ” የፕሮጅቱ ስራ ኢስኪያጅ ኢንጂነር ሐጎስ መኮንን በበኩላቸው፤ የመንገድ ግንባታው ከተጀመረ አንድ ዓመት ከአስራ አንድ ወር መሆኑን ጠቅሰው፤ “አስካሁን የአፈር ቆረጣ ፣ ድልድይ ግንባታ፣ የግንባታ ግብአቶች ማምረትና ዝግጅት እንዲሁም የውሀ መፋሰሻ ቱቦዎች ማምረት ስራ ከ80 ከመቶ በላይ ተከናውነዋል”ብለዋል ።

መንገዱ በፋፈን፣ ደገህቡርና ፊቅ ዞኖች በሚገኙ የአርብቶ አደር መንደሮች እና የወረዳ አስተዳደር ማዕከላትን በማገናኘት መንግስት የህብረተሰቡን የልማትና የመልካም አስተዳደር ጥያቄዎች ምላሽ ለመስጠት የጎላ ጠቀሜታ ይኖሯል ነው ያሉት።

በተለይ የእንስሳት ሀብት ማዕከል የሆኑና ቀደም ሲል መንገድ ያልነበራቸው አካባቢዎችን በቀጥታ ጅግጅጋና ጎዴ ከተሞችን ከሚያገናኘው ዋናው መንገድ ጋር በደናን ከተማ በኩል በአቋራጭ በማስተሳሰር የእንስሳት ንግድ ለማቀላጠፍ ምቹ ሁኔታ እንደሚፈጥር ተናግረዋል።

ፕሮጀክቱ አንድ ሺህ ያህል ዜጎች የስራ እድል ማስገኘቱን የጠቀሱት ስራ አስኪያጁ፤ ለአካባቢው ህብረተሰብም የድርጅቱ የድንገተኛ ህክምና አገልግሎት መስጫ ተሽከርካሪ እንዲጠቀም ከማመቻቸት ሌላ አስራ አንድ የዝናብ ውሃ ማሰባሰቢያ ኩሬዎች ቆፋሩና ግንባታ በራሱ ወጪ በመስራት ድርቁ የከፋ ጉዳት እንዳያርስ እያገዘ መሆኑን ገልጸዋል።

የመንገድ ግንባታው በሚያገናኛቸው ከተሞች የተሻለ ትራንስፖርት ተጠቃሚ በማድረግ የአርብቶ አደሩን ኢኮኖሚያዊና ማህበራዊ እንቅስቃሴ ያቀላጥፋል ያሉት ደግሞ የፕሮጀክቱን ስራ የሚያማክረው የ” ሲ ቴች ኢንጅንሪንግ ” አማካሪ መሃንዲስ ኑሩ አሊ ናቸው።
የፕሮጅክቱ ግንባታ በተያዘለት ጊዜ መሰረት መቀጠሉን ገልጸው፤ ቀሪ ስራዎችን በተመሳሳይ ፍጥነትና ጥራት ድርጅቱ እንደሚያጠናቀቅ የሚጠበቅ መሆኑን አብራርተዋል።

በሶማሊ ክልል ካለፉት ሦስት ዓመታት ወዲህ የፌዴራል መንግስት በመደበው በጀት ከአንድ ሺህ አንድ መቶ በላይ ኪሎ ሜትር የሚሸፍን 16 አገናኝ አስፓልት መንገዶች ግንባታ በተለያየ የአፈፃፀም ደረጃ ላይ እንደሚገኙ ኢዜአን ዋቢ አድርጎ የዘገበው ባልደረባችን አንድነት አቦዬ ነው።

ምንጭ፡- SRTV አማረኛ